Скопје, 21 јануари 2026 (МИА) - Градоначалникот на град Скопје, Орце Ѓорѓиевски, и постојаниот претставник на Програмата за развој на Обединетите нации (УНДП), Армен Григоријан, денеска официјално потпишаа меморандум за соработка.

Со потпишувањето на меморандумот, како што вели Ѓорѓиевски, се поставува јасна рамка за стратешка и долгорочна соработка во области од клучно значење за развојот на Скопје со цел унапредување на локалните политики, јакнење на институционалните капацитети и имплементација на современи и одржливи решенија во интерес на граѓаните.

Градоначалникот Ѓорѓиевски истакна дека партнерството со УНДП претставува важен чекор во продлабочувањето на соработката со една од најрелевантните меѓународни организации во областа на одржливиот развој нагласувајќи дека Градот Скопје високо ја цени нивната долгогодишна поддршка и посветеност.

Меморандумот предвидува соработка во повеќе стратешки области, меѓу кои подобрување на системите за даноци на имот и комунални такси, унапредување на урбанистичкото планирање и заштитата на животната средина, забрзување на дигиталната трансформација, поттикнување на локалниот економски развој, како и подготовка на квалитетни проекти за европски и меѓународни фондови.

Посебен акцент е ставен и на поддршката за реализација на проектот „Скопје - европска престолнина на културата 2028“, кој се гледа како значајна можност за долгорочна трансформација на градот и негово посилно позиционирање на европската културна мапа.

Според градоначалникот Ѓорѓиевски, со ова партнерство Градот Скопје уште еднаш ја потврдува својата определба за развој во насока на одржлив, модерен и европски град. дма/вј/

Фото: Град Скопје