Велес, 17 декември 2024 (МИА) - Со свечена академија во Домот на културата „Крсте Петков Мисирков“ во Градско синоќа беше одбележан 16. Декември, Ден на Општина Градско. На свеченоста пред присутните се обрати градоначалникот на Општина Градско, Киро Нацков.

Тој потенцира дека сето што го ветил е сработено и презентирано преку аудио-визуелен запис, кој го проследија сите присутни на свеченоста. Преку него беше информирано за изградба и реконструкција на многу улици во населените места во општината, реконструкција на водоводна мрежа, реконструкција на плоштадот во Градско и изградба на детски паркови во Градско и останатите населени места, како и за многубројните спортски и културни и други манифестации и настани  во Општина Градско во 2024 година.

-Дваесет и осум години Градско има статус на локална самоуправа. Постигнат е одличен резултат во многу полиња, но не го постигнав само јас и само Советот на Општина Градско. Го постигнавме заедно, граѓаните со својата инвентивност, предлози и укажувања, граѓанскиот сектор, со иницијативи и конкретни акции, бизнис секторот со донации и поддршка, меѓународни фондации и организации преку финансиска и едукативна поддршка со проекти  и пред се Владата, потенцира градоначалникот Нацков.

На свеченоста беа врачени признанијата 16 Декември, а за вкупниот придонес за афирмација на Општина Градско на општината беа доделени Плакета 16 Декември за 2024 година и Благодарница 16 Декември. Плакети добија Орданчо Митровски, ЛАГ Агро Лидер, Единица за брзо распоредување Територијална против пожарна единица Велес, Територијална против пожарна единица Крива Паланка.

Благодарници добија и ЈКП „Клепа“ Градско, Полициската станица Градско, Даниел Смилков, Панче Атанасов, Тони Милошев, Горан Ѓорѓиевски,Тони Дуков, Горан Наковски, Лазе Митков, ЉупчеТерзиов, Eрмедин Тутиќ, Муртезан Башини, Милан Секоски, Иле Славев, ИванчоСлавев ,Диме Тошев и Оливер Петрушев .

Плакета  16 Декември доби и ТППЕ Велес заедно со ТППЕ Крива Паланка, односно велешките пожарникари заедно со колегите од Крива Паланка, кои учествуваа во гаснењето на многу шумски пожари во текот на изминатото лето во Општина Градско. Пожарникарите со својата пожртвуваност и храброст заедно со месното население го спасија селата Подлес, а не дозволија пожарот да дојде близу куќите во селата Грнчиште, Скачинци, а спречија пожарите да се прошират кон селата Сирково и Росоман.

Свеченоста беше збогатена со уметничка програма со настап на трио „Џентлмен“од Скопје.

Во рамките на еднонеделната програма по повод 16 Декември, во петокот Општината Градско по третпат организираше Детски мини маратон на кој учество земаа 170 деца од ООУ „Даме Груев“ и градинката „Кокиче“ од Градско. Сите добија медал за учество, а најдобрите тројца и скромни подароци. Во рамките на програмата минатиот четврток се одржа традиционалниот Шаховски турнир. Во неделата се одржа и традиционалната крводарителска акција на која беа собрани рекордно 132 крвни единици, меѓу кои има и 15 кои првпат дарувале крв.

Вчера попладнето на шеталиштето во Градско на петнаесетина убаво уредени покриени штандови на отворено  по третпат се  одржа Базар на домашни производи, здрава храна, винопроизводителство, производство на мед, млечни производи и магарешко млеко, како и  ученички ракотворби и уметнички слики изработени од ученици, а насловен „Срцето на Македонија“. На Базарот имаше многу посетители кои вкусија од еколошки здравата храна и вкусни домашни специјалитети од домаќинките од поширокиот регион на Опшина Градско. ад/

Фото: МИА