Мадрид, 13 ноември 2024 (МИА) – Шпанија уапси еден од своите највисоки полициски функционери откако 20 милиони евра беа пронајдени скриени во ѕидовите на неговата куќа, како дел од досега најголемата истрага за шверц на кокаин во земјата.

Оскар Санчез Гил, кого колегите го опишале како дискретен и вреден, до неодамна беше шеф на одделот за измама и перење пари на Националната полиција на Шпанија во Мадрид.

Полицајците го уапсија минатата недела заедно со уште 15 лица, вклучувајќи ја и неговата девојка, која исто така е полицајка во регионот на Мадрид, соопшти полициски извор без да ја именува.

За време на рацијата, полицијата пронашла 20 милиони евра (21 милион долари) во готовина скриени во ѕидовите и таваните на домот на двојката во Алкала де Хенарес, град со околу 195.000 жители, кој се наоѓа на околу 30 километри источно од шпанскиот главен град.

Полицајците откриле и еден милион евра во неговата канцеларија, скриени во два заклучени плакари.

Двојката е обвинета за трговија со дрога, перење пари, корупција и членство во криминална организација, откако минатата недела се појавија пред судот во Мадрид, кој им одреди притвор.

Шпанските медиуми јавија дека апсењата се поврзани со заплената на 13 тони кокаин, скриен меѓу сандаци со банани, минатиот месец што пристигна во јужното пристаниште Алгесирас од најголемиот град во Еквадор Гвајакил, кој е центар за трговија со дрога. јт/

Фото: ЕПА