Во Охрид од 22 јули до 13 август петиот по ред Летен маратон на комедијата
- На програмата на петиот по ред „Summer Comedy Marathon“ се 21 шоу-претстави, од кои дел се стандардни стенд-ап комедии, но и други форми комедија со интеракција на публиката.
![Во Охрид од 22 јули до 13 август петиот по ред Летен маратон на комедијата](https://new.mia.mk/index.php/images/20230718162727_big_730x400_62.webp )
Охрид, 18 јули 2023 (МИА) – На програмата на петиот по ред „Summer Comedy Marathon“ што од 22 јули до 13 август ќе се одржува во Охрид се 21 шоу-претстави, од кои дел се стандардни стенд-ап комедии, но и други форми комедија со интеракција на публиката.
Како што беше истакнато на денешната прес-конференција во врска со прогграмската шема на манифестацијата, маратонот на комедијата стартува на 22 јули со шоуто „Импровокација“ што веќе е добро познато на охридската, но и пошироката публика.
На програмата се многу интересни содржини, меѓу кои и шоуто „2mothers brothers“, како и премиерна изведба на новото шоу „Трансакциона анализа“ на Тино и Атанас.
Потоа тука се шоута од локалната сцена како „Comedy Jam“, „Црн хумор“ и „Roast“, настапите на гости од Куманово и доста голем број на женски артисти, меѓу кои Надица Петрова и Ангела Стојановска, како и гостинки од Мексико и Америка.
На 27 јули е шоуто „The best od Balkan“ со четворица гости тројца од Србија и еден од Црна Гора, Александар Перишиќ, Срџан Олман, Никола Силиќ и Андрија Дабановиќ, на кое ќе настапи и охридскиот актер и стенд-ап комичар Никола Тодороски.
„ Се обидовме да понудиме малку да се прошири фестивалот пошироко на Балканските простори. Мислам дека ќе биде извонредна вечер во еден неверојатен амбиент на сцената на Долни Сарај. Со особено задоволство го најавувам и шоуто на мојот личен пријател и соработник од Грција со интернационална кариера кој ќе внесе една свежина во ова издание на маратонот, изјави Тодороски, дел од организаторите и учесници на маратонот.
Филип Ангеличин – Жура, кој исто така е дел од организаторите на манифестацијата, посочи дека новина оваа година е тоа што првпат шоута ќе бидат изведени на четири сцени и тоа покрај во клубот „Џез Ин“ и на сцените на Народен театар Охрид, Долни Сарај и дискотеката „Ребел“.
„Тоа што сме вмрежани во доста асоцијации е добро и за туристичката понуда на Охрид, зошто и многу стенд-ап комичари дознаваат за Охрид преку маратонот, вели Жура. аб/са/
Фото:принтскрин