Вашингтон, 16 октомври 2024 (МИА) - Американскиот претседател Џо Бајден испрати писмо до Конгресот на САД, во кое информираше за случувањата на Блискиот Исток и помошта што САД ја доделиле на Израел. Бајден во писмото до Конгресот наведе и дека САД и понатаму имаат за цел да го заштитат Израел.

„Иран на 1 октомври 2024 година лансираше над 200 балистички проектили врз Израел. Во согласност со нашата долгорочна посветеност кон безбедноста на Израел и нашите јавни намери за постојани напори да го заштитиме Израел од иранските закани, ве известувам за ставот на американските воени сили кои помагаат во одбраната на Израел од овие напади. Извонредниот учинок на нашите припадници ширум Блискиот Исток, кои работат со силна поддршка на израелските сили, придонесе за историската одбрана на Израел од иранските закани, слично како и нашиот заеднички успех на 13 април 2024 година. Нашиот заеднички успех на 1 октомври вклучуваше соборување на десетици ирански ракети пред да можат да предизвикаат штета на цивилите во Израел“, наведе Бајден во писмото.

Тој додаде дека последните месеци ги прилагодиле позициите на САД на Блискиот Исток, споменувајќи го носачот на авиони "USS Abraham Lincoln" и придружбата од борбени авиони.

„Исто така, распоредивме дополнителни разорувачи, вклучително и оние кои се способни за одбрана од балистички ракети. Подморницата со наведувани ракети "USS Georgia" и повеќе напаѓачки ескадрили на ловци од четврта и петта генерација, вклучувајќи F-22, F-15E и F-16“, стои во писмото на Бајден.

На крајот, американскиот претседател порача дека САД ќе останат посветени на одбраната на Израел. ссм/

фото: архива