Gostivar, 3 dhjetor 2024 (MIA) - Në kuadër të shënimit të Ditës Ndërkombëtare të Personave me Aftësi të Kufizuara në Gostivar 3 Dhjetori, ministri i Çështjeve Sociale, Demografisë dhe Rinisë, Fatmir Limani, i shoqëruar nga ushtruesi i detyrës kryetar i komunës së Gostivarit, Valbon Limani, vizituan Qendrën e Autizmit “Blu Puzël”.

Ata, thuhet në kumtesë, realuzuan takime me punonjësit dhe prindërit e fëmijëve që përdorin shërbimet e qendrës dhe kanë të bëjnë me punën dhe kushtet e "Blu Puzël".

"Shërbimet dhe kujdesi që ne ofrojmë janë të një standardi të lartë dhe ndër më modernët dhe janë falas. Përveç akreditimit ndijor, qendra ka edhe terapistë të akredituar. Kjo vizitë është një motiv për ne që të vazhdojmë punën dhe të jemi edhe më të suksesshëm", tha koordinatori i qendrës, Valona Emini.

Ndërkaq, kryetari i Komunës së Gostivarit, Valbon Limani, theksoi se Qendra “Blu Puzël” është shembull i mirë i bashkëpunimit të mirë ndërmjet komunitetit lokal, pushtetit lokal dhe atij qendror.

"Nga ky vend dhe në këtë ditë mund t'u dërgoj një mesazh komunave të tjera që të ndjekin këtë shembull dhe të bashkëpunojnë. Gjithashtu dua të them se jo vetëm sot, kur festojmë Ditën Ndërkombëtare të Personave me Aftësi të Kufizuara, por duhet të kujdesemi për ta gjatë gjithë vitit", tha Limani.

Për ministrin, kjo ishte një mundësi për të kujtuar se është obligim dhe përgjegjësi të krijohen mundësi për shfrytëzimin dhe zhvillimin e potencialit të të gjithë personave, veçanërisht personave me aftësi të kufizuara. Ai kujtoi shërbimet sociale që ofrohen përmes sistemit të mbrojtjes sociale.

"Personat me aftësi të kufizuara hasin shpesh pengesa të ndryshme, jo vetëm fizike, por edhe sociale, emocionale, ekonomike. Këta njerëz nuk duhet të perceptohen nga paaftësia e tyre, por nga aftësitë, talentet, potencialet e tyre", theksoi ministri Limani. bsh/