Napoli, 30 tetor 2024 (MIA) - Trajneri i Napolit, Antonio Konte, është i kënaqur nga atmosfera në ekip dhe gatishmërinë e të gjithë futbollistëve që të vendosen në funksion të realizimit të rezultateve të mira.

"Ajo që më bën krenar është se vetëm për katër muaj kemi arritur të krijojmë kohezion, ku mendojmë për ekipin, e jo për lojtarët individualë. Ky është një nga ekipet më të mira që i kam pasur në karrierë - të gjitha kanë vizion të njëjtë dhe qëllime të njëjta, nga krerët e klubit deri te personeli mjekësor. E tërë kjo krijon atmosferë të shkëlqyeshme. Unë marr frymë në atë pasion dhe entuziazëm, kështu që kur jam në atë mjedis, kjo e nxjerr në pah pasionin edhe tek unë. Pasioni në Napoli është përgjegjësi e madhe dhe kuptoj se ditët pas ndeshjeve mund të jenë të vështira nëse nuk fitoni. Ky është vend emocional, ku disponimi mund të ndryshojë shpejt", deklaroi Konte.

Ai kërkoi të mos krijohet eufori pas fillimit të mirë të sezonit.

"Mos harroni se sezonin e kaluar kjo skuadër ishte 41 pikë pas liderit. Nuk fshehim se duam të bëjmë realitet ëndrrat e tifozëve të Napolit, por duhet të jemi edhe me këmbë në tokë. Më vjen mirë që skuadra po punon mirë, por duhet të jemi gati për dështime dhe gabime", tha trajneri i Napolit në intervistë për DAZN.

Napoli mbrëmë në xhiron e 10-të në Seria A e mundi Milanin si mysafir me rezultatin 2:0 dhe gjendet në pozitën e liderit me 25 pikë. bsh/

Foto: EPA