Скопје, 8 јануари 2025 (МИА) - Премиерот Христијан Мицкоски денеска ќе престојува во посета на општина Штип. 

За време на посетата, Мицкоски ќе присуствува на пуштањето во употреба на клон од детската градинка „Вера Циривири Трена“ и спортска балон сала во рамки на подрачното училиште ОУ „Гоце Делчев" во населеното место Три Чешми.

Изградбата на клонот на детската градинка е финансирана од буџетот на Општина Штип во вредност од 2.500.000 денари и со неа се овозможува згрижување на околу 40 деца од Три Чешми. 
 
Спортската сала во рамки на подрачното училиште ОУ „Гоце Делчев“ е финансирана пред една година од остатокот од блок дотациите на Министерството за образование и наука во буџетот на Општина Штип. Вредноста на проектот е повеќе од 10.000.000 денари.

Напладне, премиерот ќе присуствува на поставување на камен темелник за главниот резервоар за вода во населено место Пребег. Со градењето на овој резервоар со капацитет од 1.500 кубни метри се очекува да се реши деценискиот проблем со водоснабдувањето на овој дел од Штип. Вредноста на проектот е 41.000.000 денари, средства обезбедени од наменска сметка од самопридонес на граѓаните на Општина Штип. бак/

Фото: МИА архива