Кризниот штаб на Град Скопје заседава, дел од градоначалниците се самоорганизираа да го исчистат сметот
Скопје, 9 јули 2023 (МИА) - Во Град Скопје вечерва заседава Кризниот штаб за актуелните случувања во „Комунална хигиена“. По седницата најавена е изјава за медиумите на градоначалничката Данела Арсовска.
Дел од медиумите вечерва јавија дека е тензично пред просториите на „Комунална хигиена“ каде протестираат вработените поради отпуштање на дел од вработените и барања за зголемување на платите.
Во меѓувреме, дел од скопските градоначалници од редовите на ВМРО-ДПМНЕ се самоорганизираа за вечерва да ги исчистат улиците од сметот.
-Градоначалниците на ВМРО-ДПМНЕ на општините во состав на град Скопје, гледајќи ја неспособноста на градските власти и Арсовска вечерва се самоорганизираат. Градоначалниците Тимчо Муцунски на Аеродром, Орце Ѓорѓиевски на Кисела Вода, Бобан Стефковски на Гази Баба, Александар Стојкоски на Ѓорче Петров и Дарко Костовски на Бутел ќе бидат на терен со општинските служби во чистење на Скопје, соопшти вечерва ВМРО-ДПМНЕ. бак/ев/
Фото: МИА архива
