„Њујорк тајмс“: Русија му испoрачува на Иран напредни системи за противвоздушна одбрана
- „Двајца ирански владини функционери запознаени со военото планирање, од кои еден е припадник на Корпусот на Исламската револуционерна гарда, потврдија дека Иран го поднел барањето и додале дека Русија почнала да испорачува напредни радари и опрема за противвоздушна одбрана“, пишува американскиот весни
![„Њујорк тајмс“: Русија му испoрачува на Иран напредни системи за противвоздушна одбрана](https://new.mia.mk/index.php/images/20240806142103_big_730x400_51.webp )
Њујорк, 6 август 2024 (МИА) – Две ирански официјални лица изјавија дека Техеран побарал од Русија напредни системи за противвоздушна одбрана додека Исламската Република се подготвува за можна војна со Израел, јави весникот „Њујорк Тајмс“.
Информацијата беше објавена еден ден по посетата на секретарот на рускиот Совет за безбедност, Сергеј Шојгу, на Техеран.
„Двајца ирански владини функционери запознаени со военото планирање, од кои еден е припадник на Корпусот на Исламската револуционерна гарда, потврдија дека Иран го поднел барањето и додале дека Русија почнала да испорачува напредни радари и опрема за противвоздушна одбрана“, пишува американскиот весник .
Врховниот лидер на Исламската Република, ајатолахот Али Хамнеи, му нареди на Иран да изврши директен напад врз Израел, откако лидерот на политичкото крило на Хамас, Исмаил Ханија беше убиен во Техеран, каде што присуствуваше на церемонијата на инаугурација на новиот претседател Масуд Пезешкијан.
Американските и израелските власти соопштија дека очекуваат Иран и неговите сојузнички вооружени групи во регионот да извршат голем и координиран напад врз Израел. Милициите познати како „оската на отпорот“ ги вклучуваат Хезболах во Либан и Хутите во Јемен.
На снимката објавена од иранската државна телевизија се гледаат Шојгу и началникот на Генералштабот на иранските вооружени сили, Мохамад Багери, како приватно разговараат, а потоа учествуваат на состанокот на руската делегација со иранската војска.
-Подготвени сме за целосна соработка со Иран за регионални прашања, изјави Шојгу, цитиран од иранските државни медиуми, додека генерал Багери изјави дека „билатералните односи се длабоки, долгорочни и стратешки“ и додаде дека очекува да се прошират.
„Њујорк Тајмс“ забележува дека Русија има и економски и културни врски со Израел, каде што живеат многу руски Евреи, но, меѓутоа, некои аналитичари велат дека Москва не може да си дозволи да ја одбие побараната помош од Иран бидејќи премногу се потпира на иранските беспилотни летала за војната во Украина.
„Ако Иранците бараат од Русите противвоздушна одбрана, тие ќе ги заработат нивните чипови“, рече за американското издание Колин П. Кларк, директор за политика и истражување во консултантската компанија за разузнавање и безбедност „Суфан груп“. „Прашањето е како Русите да го задоволат Техеран без да ги нарушат односите со Израел“, додаде американскиот експерт.