Јапонија: Користејќи астероиден прав, ќе се истражува потеклото на животот на Земјата
- Научниците од Јапонската вселенска агенција се обидуваат да откријат како водата испарува на астероидот, со надеж дека ќе има траги што би укажале на потеклото на Сончевиот Систем и животот н
![Јапонија: Користејќи астероиден прав, ќе се истражува потеклото на животот на Земјата](https://new.mia.mk/index.php/images/20221105195932_big_730x400_74.webp )
Токио, 5 февруари 2021 (МИА) - Јапонски астрономи ќе истражуваат примероци на почва земена од далечен астероид за да се обидат да го откријат изворот на топлина што го променил тоа небесно тело.
Научниците од Јапонската вселенска агенција се обидуваат да откријат како водата испарува на астероидот, со надеж дека ќе има траги што би укажале на потеклото на Сончевиот Систем и животот на Земјата. Тие веќе тестирале 5,4 грама почва, далеку повеќе од минималниот примерок од 0,1 грам на кој се надевале.
Во декември вселенското летало „Хајабуса 2“ се врати од Вселената со примерок од почвата од астероидот Рјугу, којшто се наоѓа на повеќе од 300 милиони километри од Земјата. Топлината на астероидот надминува 300 степени Целзиусови, според научниците од јапонскиот Универзитет во Аизуа.
Сондата стапна на вселенското тело во април 2019 година, и вторпат - три месеци подоцна.
Можни траги од органска материја
Научниците, исто така, истакнуваат дека температурата под површината на една планета не може да достигне толкава висина само од топлината на Сонцето, што укажува дека астероидот Рјугу, додека бил дел од поголемо матично тело пред милијарди години, бил под влијание на внатрешно топлинско зрачење или планетарни судири.
Јапонската вселенска агенција продолжува со првичните тестирања на примероци од астероидот, а следната година се планираат и пообемни испитувања.
Научниците исто така ќе трагаат по можни траги од органска материја, во надеж дека ќе најдат некои одговори за потеклото на Сончевиот Систем и животот на Земјата.