Скопје, 21 октомври 2024 (МИА) – Не е надминат проблемот со греењето во училиштата во Општина Карпош, кои на барање на градоначалникот Стевчо Јакимовски ќе биде одложено односно ќе почне од 1 ноември. Од Владата тој побара да ги покрие трошоците за греење на општинските основни училишта.

-За жал, не се надмина се уште проблемот. Очекувам овие денови да имам состанок со градоначалникот на Карпош. Жал ми е што треба да соопштам дека се искористени блок-дотациите за оваа година.  Оваа година Општина Карпош со ребалансот добила 18 милиони денари повеќе, за што верувам дека не се сосема доволно и искрено се надевам  и повторно велам дека ќе изнајдеме некакво решение со градоначалникот, се разбира со негови поголеми услуги отколку од Министерството бидејќи, сепак, станува збор за закон, изјави министерката за образование и наука Весна Јаневска на завршен настан од проектот ISEC-ADE.

Посочи дека за буџетот следната година планираат повеќе средства, не само за Карпош, туку и за други општини кои се во слична ситуација, а ако има можности, рече, ќе им удоволат и на сите општини.

Јакимовски на 14 октомври ја повика Владата да ги покрие трошоците за греење на општинските основни училишта во висина од 8,3 милиони денари, зашто локалната самоуправа, рече, не е должна да го прави тоа. Јакимовски нагласи дека минатата година за децата да не останат без греење, Општината издвоила шест милиони денари зашто, исто така, Владата не сакала да ги плати сметките. 

Тој во четвртокот ја повика Јаневска да разговараат за проблемот и, како што соопшти Општина Карпош, „замоли за наредниот буџет да се расчистат овие работи“. 

-Станува збор за околу 16 милиони денари, токму тие пари ни недостасуваат. Минатата година плативме 6 милиони денари, годинава имаме 8,3 милиони денари за греење. Тоа се големи пари за локалната самоуправа. Од друга страна, имаме општини кои се бањаат со пари. Замислете општина Желино ќе финансира академија на науки и уметности, смета Јакимовски.

На почетокот на грејната сезона, од АД ЕСМ информираа дека на барање на Општина Карпош, во основните училишта греењето наместо на 15 октомври, ќе започне на 1 ноември. хс/бак/

Фото: МИА архива