Штип, 7 март 2024 (МИА) - Состаноците на македонско-бугарската историска комисија се одржуваат редовно и засега нема никаков напредок, изјави денеска во Штип академик Драги Ѓоргиев, кој е копретседател на Заедничката мултидисциплинарна експертска комисија за историски и образовни прашања меѓу Северна Македонија и Бугарија.

Тој посочи дека годинава Комисијата одржала состанок во февруари, а следниот е во април. На прашањето кога ликот и делото на Гоце Делчев ќе бидат ставени на дневен ред на Комисијата, Ѓоргиев со одговор дека дневниот ред се одредува пред самиот состанок.

-Се уште немаме утврдено дневен ред за следниот состанок, вели Ѓоргиев.

Прашан, кога се очекува напредок по толку поминати состаноци и дали ќе имаат некое решение, кое ќе го објават на јавност, Ѓоргиев изјави дека Комисијата ќе работи се додека има простор за разговор.

-Треба да се водат разговори, дијалогот треба да продолжи, а за резултатите кога ќе бидат тоа е неизвесно, рече Ѓоргиев.

Посочи дека Комисијата дискутира за македонските учебинци за седмо одделение и за бугарските учебници за шестто одделение.

-Нема усвоено никакви препораки за учебниците за седмо одделение и во тек е дискусија за нив веќе подолго време. Така да нема никакви препораки, кои се дадени до владите на двете земји за учебниците по седмо одделение. Се дискутира за учебниците за македонскиот образовен систем и шестто одделение за бугарскиот образовен систем, веќе ги завршивме тие. Тоа е среден век, изјави Ѓоргиев пред промоцијата на монографијата за основополжникот на музичката дејност во земјава, Сергеј Михајлов на Факултетот за образовни науки при Универзитетот „Гоце Делчев“-Штип.

Прашан дали ќе има промени на членовите на македонско-бугарската историска комисија, Ѓоргиев истакна дека тоа не зависи од членовите, туку тоа какошто рече зависи од политичката гарнитура. вдј/ац/

Фото: МИА архива