Штип, 23 ноември 2024 (МИА) - Општина Штип почна постапка за добивање на право на сопственост за Домот за стари лица, кој е изграден до фаза на карабина. Изградбата на објектот почна пред десет години, но поради незапазување на процедурите беше прогласен како дивоградба, а градежните активности се запрени.

Секретарот на Општина Штип, Вишна Шорова-Ангелова изјави дека документите се доставени до Владата и се чека одговорот од институциите, со што како што вели, треба да бидат решени имотно-правните прашања околу објектот.

 -Со оглед на тоа што, во периодот кога почнал да се гради Домот за стари лица во Штип, не постоела планска документација, а во меѓувреме е изготвена и одговара на изгледот, на габаритот на објектот, се надеваме дека со тоа ја откочивме постапката и ќе може да продолжи понатаму со градба, вели Шорова-Ангелова.

Во изградбата на Домот за стари лица инвестираше Здружението на пензионери од Штип, кој треба да е на површина од околу 3.000 метри квадратни. Во 2014 година, Општина Штип на Здружението на пензионери му го предаде некогашниот воен ресторан „Вардар“, кој е лоциран  веднаш до касарната „Јане Сандански“, а претходно општината просторот го доби од Министерството за одбрана. Тогаш Здружението го сруши ресторанот и  ја вложи целата своја заштеда во висина од 600.000евра.

Шорова-Ангелова посочува дека откако ќе завршат постапките, ќе треба да се направат нови пресметки за целосна изградба на Домот за стари лица.

 - Се уште немаме направено такви пресметки. Располагаме со проектот со кој е аплицирано во системот за добивање на одобрение за градба, меѓутоа доколку има потреба од ревизија на истиот, се разбира дека ќе биде направена, изјави Шорова-Ангелова.

Домот за стари лица во Штип треба да биде со капацитет за 120 лица, а во источниот регион, само во Берово има ваква институција, во која се згрижуваат старите лица. вдј/бак/

Фото: МИА