Штип, 12 август 2022 (МИА) - Штипското комунално претпријатие „Исар“ кредитот кој го има земено пред 20 години ќе ги исплати во 2026 година, истакна на денешната прес-конференција директорот, Трајче Здравков. Направил анализа, која покажува дека  парите од кредитот се подигнати во 2002 година со одобрение и потпис од тогашниот градоначалник Димитар Ефремов. Кредитот имал грејс период од три години што значи од 2005 година требало да започне неговото исплаќање. Кредитот е подигнат за реконструкција на водоводната и канализациона мрежа, и со парите како покапитални проекти се реконструкција и обнова на дел од зградата на претпријатието и набавка на нови камиони. -Повлечени се средства во износ од 163.839 000 денари во периодот од 2002 до 2006 година. Грејс периодот за враќање на кредитот е до 2005 година. Од тогаш се сменија шест директори на ЈП Исар и исто толку градоначалници, а динамиката на враќање е следана. Во 2005 година доспеани обврски за плаќање се 24 милиони денари, вратени се само 72 илјади денари. 2006 година се доспеани нови 20 милиони денари, вратени се 8 милиони и 800 илјади денари и заостанат долг имаме од 11 милиони и 400 илјади денари. Во 2007 – 2008 година доспеале нови 43 милиони денари, вратени се 11 милиони и заостануваат 32 милиони денари, вели  Здравков. Во периодот кој следи односно од 2010 до 2014 година, посочува, е исплатено најмногу од долгот за кредит на ЈП Исар. -Од 2010 до 2014 година тогашниот директор имал најголема доспеана обврска од 67,5 милиони денари и во тој период е вратен целиот доспеан износ, а платени се и дополнителни 8,3 милиони денари. Од 2014 до 2017 година се доспеани 23 милиони денари и таа обврска во целост е исплатена, а во средината на 2016 платени се уште 8 милиони денари. Во 2018 година веќе вкупниот долг под главница е 69 милиони денари и во период од три години не е исплатена ниту една доспеана обврска, рече Здравков. Појасни дека во  минатото рата за долгот на шест месеци била 7 до 8 милиони денари, сега за истиот период се потребни 22 милиони денари. Јавното претпријатие Исар има обврска да плаќа по 3,7 милиони денари рата само за кредитот месечно, а до сега се исплатени околу 25 милиони денари. Договорот за кредитот е целосно да биде подмирен до 2026 година. вдј/вј/