Шпанскиот суд ја забрани социјалната мрежа Телеграм
- Окружен суд во Шпанија ја забрани социјалната мрежа за пораки Телеграм по жалбите на медиумските компании дека им дозволува на корисниците да ја прикачуваат нивната содржина без дозвола, пренесуваат британските медиуми.
![Шпанскиот суд ја забрани социјалната мрежа Телеграм](https://new.mia.mk/index.php/images/20240323155810_big_730x400_61.webp )
Мадрид, 23 март 2024 (МИА) - Окружен суд во Шпанија ја забрани социјалната мрежа за пораки Телеграм по жалбите на медиумските компании дека им дозволува на корисниците да ја прикачуваат нивната содржина без дозвола, пренесуваат британските медиуми.
Судот се согласи да ја блокира употребата на Телеграм во Шпанија почнувајќи од понеделник, се додека трае истрагата за ваквите наводи.
-Давателите на мобилни услуги ќе бидат одговорни за блокирање на услугите на Телеграм, изјави судски извор.
Телеграм се уште не излезе со коментар на пресудата на шпанскиот суд.
Телеграм е четврти најкористен сервис за испраќање пораки во Шпанија, која ја користат речиси 19 отсто од населението.
Телеграм е сервис за испраќање и размена на инстант пораки, развиен од компанијата Telegram Messaging LLP ,со седиште во Лондон и оперативни центри во Дубаи. Компанијата е основана од рускиот претприемач Павел Дуров, претходно познат како основач на популарната руска социјална мрежа ВКонтакте.
Компанијата наведува дека во 2023 година имала над 700 милиони активни корисници ширум светот. сд/
фото:МИА архива