Шеф на украинско воено разузнавање: Ќе се соочиме со тешка, но не и катастрофална ситуација
- Од средината на мај до почетокот на јуни Украина ќе биде во тешка ситуација, но без катастрофални последици, изјави шефот на украинската воена разузнавачка служба Кирило Буданов за Би-Би-Си Украина.
![Шеф на украинско воено разузнавање: Ќе се соочиме со тешка, но не и катастрофална ситуација](https://new.mia.mk/index.php/images/20240422185036_big_730x400_91.webp )
Киев, 22 април 2024 (МИА) - Од средината на мај до почетокот на јуни Украина ќе биде во тешка ситуација, но без катастрофални последици, изјави шефот на украинската воена разузнавачка служба Кирило Буданов за Би-Би-Си Украина.
„Според наше мислење, во блиска иднина ќе се соочиме со прилично тешка ситуација. Но, тоа не е катастрофално, исто така мора да се разбере. Армагедон нема да се случи, како што многумина сега почнуваат да зборуваат. Но, ќе има проблеми од средината на мај“, предвидува Буданов.
Буданов појасни дека неговите предвидувања се однесуваат на цела Украина, а не само на ситуацијата во борбената зона. Тој рече дека „Русите ќе користат сеопфатен пристап“.
„Тие (Русите) спроведуваат сеопфатна операција. Нема да зборуваме многу за тоа, но ќе биде тешко. Средината на мај, почеток на јуни“, нагласи Буданов.
Експертите од Институтот за проучување на војната оценија дека руските сили најверојатно ќе ги интензивираат своите тековни офанзивни активности и напади со проектили и дронови во следните недели, со цел да го искористат периодот до пристигнувањето на американската воена помош. ссм/
фото: ЕПА архива