ХРВ ја критикува Мета за „цензурирање“ на пропалестинската содржина
- Извештајот на Хјуман рајтс воч (ХРВ) денеска ја осуди Мета, компанијата што управува со социјалните медиуми Фејсбук, Инстаграм и WhatsApp, за „замолчување на гласовите на поддршка за Палестина“.
![ХРВ ја критикува Мета за „цензурирање“ на пропалестинската содржина](https://new.mia.mk/index.php/images/20231221173316_big_730x400_89.webp )
Њујорк, 21 декември 2023 (МИА) - Извештајот на Хјуман рајтс воч (ХРВ) денеска ја осуди Мета, компанијата што управува со социјалните медиуми Фејсбук, Инстаграм и WhatsApp, за „замолчување на гласовите на поддршка за Палестина“.
-Политиките на Мета и системите за модерација на содржината сè повеќе ги замолчуваат пропалестинските гласови на Инстаграм и Фејсбук по непријателствата меѓу израелските сили и палестинските вооружени групи, се вели во извештајот на 51 страница, насловен „Прекршените ветувања на Мета: системска цензура на палестинската содржина на Инстаграм и Фејсбук".
Хјуман рајтс воч откри дека проблемот произлегува од погрешните Мета-политики и нивната неконзистентна и погрешна имплементација, прекумерното потпирање на автоматизираните алатки за модерирање на содржината и прекумерното влијание на владата врз отстранувањето на содржината.
ХРВ прегледа 1.050 случаи на онлајн цензура од повеќе од 60 земји.
Според извештајот на ХРВ, постојат шест клучни обрасци на цензура и „секоја се повторува во најмалку 100 случаи како што се отстранување содржина, суспендирање или бришење профили, неможност за интеракција со содржината, неможност за следење или означување сметки, ограничувања за користење на функции како Instagram /Facebook Live...
Според ХРВ, Мета ја користи својата политика за „опасни организации и поединци“ нашироко за да го ограничи легитимниот говор за непријателствата меѓу Израел и палестинските вооружени групи.
Палестинските активисти за социјални медиуми долго време се жалат на пристрасноста на платформите на социјалните медиуми бидејќи се соочуваат со зголемени ограничувања, со блокирани или отстранети многу содржини.
Центарот за заедницата Сада, организација посветена на следење и документирање на дигитални прекршувања на палестинската содржина на интернет, рече дека платформите на социјалните медиуми отстраниле илјадници објави и профили од 7 октомври, денот кога избувнаа борбите меѓу Хамас и Израел. мс/