Скопје, 25 октомври 2021 (МИА) - Ракописот „Хотел меѓу две војни“ од авторот Александар Русјаков е победник на третото издание на книжевната награда „Пегаз“ за најдобар необјавен роман за 2021 година. На годинашниот конкурс за оваа награда што ја организираат издавачката куќа „Арс Ламина“ и Фондацијата „Славко Јаневски“, се пријавија и учествуваа 44 ракописи. За победникот одлучи жирито во состав на проф. д-р Владимир Мартиновски од Катедра за општа и компаративна книжевност при Филолошкиот факултет „Блаже Конески“, Фросина Пармаковска, писателка и добитничка на наградата „Роман на годината“ за 2017 година и Бисера Бендевска, уредничка во издавачката куќа „Арс Ламина“. Во образложението на жирито се наведува дека „Хотел меѓу две војни“ е историографска метафикција посветена на култната љубовна приказна за Мустафа Кемал Ататурк и Елени Каринте. Прикажани во вителот на бурните историски настани на Балканот и во Европа, пред сè, многубројните војни од првата половина на ХХ век, судбините на Мустафа и Елени се прикажани преку вештите меандрирања во биографските факти и во многубројните реминисценции и психолошки портретирања на ликовите. – Престојувајќи во бизарен хотел кој асоцира на задгробниот свет, но во соба со поглед на Битола, Мустафа Кемал Ататурк понира во фантазмагоричниот свет на спомените и соништата, во кој на еден непредвидлив начин се мешаат сликите од минатото и од интимната историја на протагонистите. Приказната за Мустафа и Елени е раскажана оригинално, преку калеидоскоп од сугестивни сцени, впечатливи прозни пасажи и вешто водени дијалози, се истакнува во образложението на жирито. Како што се посочува, овој роман проблематизира и низа историски моменти и ликови, видени од специфичната призма на авторот која е оригинална, темелна и извонредно визуелно ефектна. -Светот што овој роман ни го претставува е раскошен, слоевит, свет што ги обединува пределите на сонот и јавето, животот и смртта, историската реалност и фикцијата. Раскрстувајќи со секаква типичност, типизираност и клишеизираност, „Хотел помеѓу две војни“ одново ги создава личните и историските вистини, играјќи си и постојано поместувајќи ги силните противречности помеѓу она што било и она што би можело да биде; помеѓу големите и малите; Истокот и Западот; слободните избори и детерминираните улоги. Меѓу другото, ова е и роман што нуди уникатно ѕирнување во комплексниот свет на една од најинтересните историски личности, секако низ безграничните можности на фикцијата и авторовата имагинација, појаснува жирито. Покрај победничкиот роман, во најтесниот избор за наградата „Пегаз“ за 2021 година, жирито ги разгледа и ракописите „Ние“ од Ана Стојаноска и „Мастилна мапа“ од Марија Ралповска, кои се издвоија од мноштвото по своите книжевни вредности – оригиналната нарација, структурните и стилски квалитети. Наградата „Пегаз“ за најдобар необјавен роман е своевидно продолжение на веќе етаблираната награда „Роман на годината“ што ја доделува Фондацијата „Славко Јаневски“. Според Ѕвездан Георгиевски од Фондацијата „Славко Јаневски“, особено е важно што оваа награда се доделува за необјавен роман, односно роман во ракопис, што секако, како што посочува Георгиевски, овозможува пред оценката на јавноста да се појават и некои дела што можеби неправедно и неоправдано не успеале да излезат на „светлоста на денот“. –Третото доделување на оваа награда само говори дека сме на вистинскиот пат и дека наградата, полека, ама со сигурен чекор, го етаблира своето место во македонскиот културен простор, додаде Георгиевски. Наградата „Пегаз“ се состои од паричен износ од 90.000 денари и објавување на романот во посебна едиција.бт/лв/