Битола, 12 февруари 2022 (МИА) - РК Еурофарм Пелистер од сезоната 2022/23 ќе биде посилен за тунискиот репрезентативец Усама Хосни. Десниот бек на една од најдобрите африкански репрезентации потпиша двегодишен договор со битолскиот клуб, почнувајќи од следната сезона. - Хосни во Битола ќе дојде од шампионатот на Франција, каде со успех го носи дресот на Истр. Негов матичен клуб е Африкан, а потоа во 2017 година се пресели во Франција, каде настапува веќе четврта сезона. Најнапред го носеше дресот на Иври, потоа настапуваше за Понто Комбо, а од 2019 година е член на Истр. Висок е 193 сантиметри и поседува драгоцено искуство од настапи на највисоко клупско и репрезентативно ниво, соопшти Еурофарм Пелистер. Со репрезентацијата на Тунис, 29-годишниот ракометар настапи на три Светски првенства, освојувач е на едно злато и две сребра од шампионатот на Африка, а стана и клупски првак на Африка во дресот на Клуб Африкан. Запиша 102 настапи за туниската репрезентација и постигна 125 гола. Официјално претставување на Хосни во Битола предвидено е пред почетокот на сезоната 2022/23. зс/