Хаити: Полицијата фатила шест атентатори на претседателот Моиз
- Полицијата во Хаити уапсила шест мажи кои го убиле претседателот Жовенел Моиз и трагаат по организаторите кои стојат зад операцијата, изјави денеска шефот на полицијата Леон Чарлс на брифинг
![Хаити: Полицијата фатила шест атентатори на претседателот Моиз](https://new.mia.mk/index.php/images/20221107225305_big_730x400_99.webp )
Порт-о-Пренс, 8 јули 2021 (МИА) – Полицијата во Хаити уапсила шест мажи кои го убиле претседателот Жовенел Моиз и трагаат по организаторите кои стојат зад операцијата, изјави денеска шефот на полицијата Леон Чарлс на брифинг со новинарите, емитуван на телевизија.
Чарлс апелираше до населението да соработуваат со безбедносните сили и да не предизвикуваат немири, откако маса луѓе се појавија пред полициската станица во главниот град Порт-о-Пренс, каде се сместени осомничените.
Премиерот на Хаити, Клод Жозеф, денеска апелираше до граѓаните да ги предадат на полицијата осомничените убијци на претседателот Жовенел Моиз и да не ги линчуваат.
Претходно денес стотици жители на Хаити пред полициската станица во Порт-о-Пренс, каде што се наоѓаат осомничените за убиството, извикуваа „изгори ги“.
Тие запалија возило за кое претпоставиле дека е возило на атентаторите. Претседателот на Хаити Моиз (53) беше убиен од непознати напаѓачи во неговата приватна резиденција, а неговата сопруга Мартин Мари Етјен Жозеф, која исто така беше ранета во нападот, се наоѓа во критична состојба и е пренесена во болница во Мајами. јт/