Скопје, 12 јуни 2024 (МИА) – Поранешниот генерален секретар на Фудбалската федерација на Македонија (ФФМ), Филип Поповски, ќе биде делегат на финалето на ЕВРО2024 кое ќе се одигра на 14 јули на Олимпискиот стадион во Берлин.
Како што денеска соопшти ФФМ, Поповски е одреден за делегат на трите натпревари од групната фаза кои ќе се одиграат на Олимпискиот стадион во Берлин: меѓу Шпанија – Хрватска, Полска – Австрија и, Холандија – Австрија, како и осминафиналето, четвртфиналето и големото финале на 14. јули 2024.
Паралелно со ова во организација на ЕВРО2024 вклучен уште еден претставник на ФФМ, фитнес тренерот Сашо Даневски.
Даневски веќе три седмици е во Франкфурт каде работи со делегираните судии за Европското првенство, а воедно беше одговорен за следење на тренинг процесот на судиските тимови кои ја делеа правдата и на финалните натпревари од Лига на шампиони и Лига Европа.
„Ова признание и улогата која им е доделена на Филип Поповски и Сашо Даневски ја истакнува стручноста, посветеноста и професионализмот во нашата федерација. Во улога на делегати на мечевите во организација на УЕФА, нашите претставници и досега ги одржуваа највисоките стандарди на организација и ефикасност на натпреварите. Дополнително, нашите фитнес тренери работат со судиите за да се осигурат дека тие се во врвна физичка кондиција, што е клучно за одржување на брзиот и напорен карактер на турнирот“, соопшти ФФМ. ег ФОТО: ФФМ