Атал: Франција ќе тужи ученичка поради лажно обвинение дека била удрена од директорот поради носење хиџаб
- Францускиот премиер Габриел Атал денеска најави дека државата ќе тужи малолетничка поради лажното обвинение дека директорката на училиштето ја удрила за време на расправија откако таа одбила да си го отстрани хиџабот.
![Атал: Франција ќе тужи ученичка поради лажно обвинение дека била удрена од директорот поради носење хиџаб](https://new.mia.mk/index.php/images/20240328091915_big_730x400_21.webp )
Париз, 28 март 2024 (МИА) - Францускиот премиер Габриел Атал денеска најави дека државата ќе тужи ученичка поради лажното обвинение дека директорот на училиштето ја удрил за време на расправија откако таа одбила да го тргне хиџабот.
Според францускиот закон, не е дозволено носење хиџаб и никаб во јавните установи, што директорот им го посочил на трите ученички, од кои две потоа ги тргнале шамиите.
Третата не ја тргнала шамијата и имало расправија, но полицијата не нашла докази дека директорот физички ја нападнал ученичката, а Атал сега тврди дека ќе биде изведена на суд.
„Државата секогаш ќе стои покрај овие службеници, оние кои се на линијата на фронтот соочени со овие прекршувања на секуларизмот, овие обиди на исламистите да влезат во нашите образовни институции“, рече тој.
Во деновите што следеле, директорот бил цел на смртни закани на социјалните мрежи, што училиштето го пријавило до Министерството за внатрешни работи, пренесува Би-би-си.
Обвинителите соопштија дека две лица се приведени во врска со смртните закани, а нивниот идентитет не е објавен, но Министерството за образование соопшти дека тие не се поврзани со училиштето.
Поради смртни закани и загрозена безбедност, директорот поднесе оставка по 45-годишна кариера во образованието. рп/
Фото: ЕПА