Барселона, 19 септември 2024 (МИА) - Тренерот на Барселона, Ханс Флик, ја коментираше повредата на играчот од средниот ред Фермин Лопез.

-Се чувствувам виновен за повредата на Фермин. Тој играше на два турнири во текот на летото. Требаше да зборувам со тренерот на шпанската младинска репрезентација, но не го направив тоа затоа што мислев дека штотуку пристигнав во Барселона, изјави Флик.

На 17 септември, каталонскиот клуб објави дека 21-годишниот Шпанец заработил повреда на десниот бутен мускул за време на тимскиот тренинг.

Фермин претходно заздрави од повредата на тетивата, поради која пропушти два натпревара од Лигата на нации и не учествуваше на натпреварот од шпанското првенство против Жирона на 15 септември. Неговото враќање требаше следната недела. Лопез сега ќе помине уште околу три недели во процес на закрепнување. зс/

Фото: ЕПА