Џеда, 11 јануари 2025 (МИА) - Тренерот на Барселона, Ханси Флик изрази надеж дека во утрешното финале против Реал Мадрид за шпанскиот Суперкуп неговиот тим ќе се претстави подобро отколку во полуфиналето против Атлетик Билбао и дека истата игра ќе ја прикаже од победата од 4:0 над големиот ривал на „Сантијаго Бернабеу“, претходно во сезоната.

-Реал Мадрид е меѓу најдобрите тимови во светот. Мора да играме побрзо и подобро отколку против Атлетик Билбао, бидејќи зборуваме за Реал Мадрид, кој одлично знае како да се справи со натпреварот и може да ја искористи секоја ситуација. Ова се специјални натпревари и мораме да бидеме подготвени, изјави тој.

Како тренер, вели, има играно во многу финалиња, а тимот е добро подготвен.

-Тоа е голем натпревар, Суперкупот, и ако го освоиме, ќе имаме голема самодоверба до крајот на кампањата. Победата на овој натпревар ќе биде многу голема работа за сите нас, додаде Флик. дс

Фото: Архива