Филмот „Nomadland“ со четири БАФТА награди
- Свеченоста на Британската филмска академија (БАФТА) се одржа виртуелно во две вечери, а кандидатите, поради корона-пандемијата, учествуваа на доделувањата преку видеоврски. Освен, секако филм
![Филмот „Nomadland“ со четири БАФТА награди](https://new.mia.mk/index.php/images/20221107013313_big_730x400_43.webp )
Лондон, 12 април 2021 (МИА) - Американската драма „Земја на бескуќници“ (Nomadland), која следи група луѓе кои решиле да живеат во комбе, е големиот победник на БАФТА наградите што беа доделени вчера. Филмот ги освои наградите за најдобар филм, најдобра режија - Кинезинката Клои Жао и - за главна женска улога - Франсис Мекдорманд.
Свеченоста на Британската академија за филмски и телевизиски уметности (БАФТА) се одржа виртуелно во две вечери, а кандидатите, поради корона-пандемијата, учествуваа на доделувањата преку видеоврски. Освен, секако, филмските sвезди Хју Грант и Пријанка Чопра Џонас кои се појавија лично во лондонскиот „Ројал Алберт хол“ и, Рене Зелвегер и Ана Кендрик кои се приклучија од студиото во Лос Анџелес.
Филмот „Ветувачка млада жена“ (Promising Young Woman), што ја нагласува важноста на движењето против насилството и сексуалното вознемирување - „#metoo“, е прогласен за извонредно британско дело, а ја доби и наградата за најдобро оригинално сценарио.
Академијата му оддаде почит и на принцот Филип, сопруг на кралицата Елизабета, кој почина во петокот на 99-годишна возраст. Филип беше назначен за прв претседател на БАФТА во 1959 година. Неговиот внук, принцот Вилијам, е сегашен претседател.
Филмскиот ветеран Ентони Хопкинс ја освои наградата за главна машка улога - на дементен човек во филмот „Таткото“. си/сд/