Лондон, 10 ноември 2022 (МИА) - Болидот на Ферари „Ф2003-ГА“, во кој Михаел Шумахер ја освои својата шеста светска титула во Формула 1, беше продаден од страна на аукциската куќа „Сотби“ за рекордна сума за вакви автомобили - 14,6 милиони швајцарски франци или 14,8 милиони долари. Во 2003 година, Шумахер ја освои титулата по тешка борба со Кими Раиконен од Мекларен и Хуан Пабло Монтоја од Вилијамс. Германецот постигна шест победи во сезоната и заработи два бода повеќе од главниот ривал. Шасијата ставена на аукција беше искористена на трки 9 пати, вклучително и во одлучувачкото Јапонско Гран при, како резултат на што Мајкл ја освои титулата и го надмина рекордот на Хуан Мануел Фанџо по бројот на освоени шампионски титули. „F2003-GA“ требаше да се продаде за 9,3 милиони долари, но износот значително се зголеми по 40-минутната понуда. Претходниот рекорд за продажба на автомобил Ф-1 беше поставен пред пет години, кога  Ферари „Ф2001“ достигна вредност 7,5 милиони долари. Најскапиот автомобил во светот останува „Mercedes-Benz 300 SLR Uhlenhaut Coupe“ од 1955 година, направен во само два примерока. Во мај оваа година беше продаден за 142 милиони долари. зс/