Вашингтон, 26 април 2024 (МИА) - Американската Администрација за храна и лекови (ФДА) денеска соопшти дека траги од птичји грип се пронајдени во еден од секои пет тестирани примероци на пастеризирано млеко за продажаба, со што се добиле изненадувачки докази дека вирусот најверојатно е раширен меѓу американските говеда.

Сепак, од Агенцијатa изјавија дека не постои причина да се верува дека вирусот најден во млекото е ризичен по здравјето на луѓето.

- Ова само укажува дека вирусот силно навлегол кај добитокот низ целата земја, изјави д-р Мајкл Естерхолм, експерт за инфективни заболувања во Универзитет на Минесота, пренесоа некои американски медиуми.

Според експертите, процесот на пастеризирање го прави вирусот неефективен. Сепак, од ФДА укажаа дека треба да се направат дополнителни тестови за да се утврди дека во млекото нема инфективен вирус.

- Досегашните испитувања на млекото што е во широка потрошувачка немаат резултати кои ќе ги променат нашите оценки дека млечните продукти во продажба се безбедни за употреба, изјавија од ФДА.  

Според Министерството за земјоделство, осум сојузни држави досега потврдиле случаи на птичји грип кај 33 стада на говеда, додека има потврда дека само едно лице, фармер од Тексас, било заразено од епидемијата. кб/паг/