УЈП е дел од програмата „Даночни инспектори без граници’
- Даночните инспектори од Управата за јавни приходи преку експертска поддршка во наредниот период ќе стекнат вештини за спроведување конзистентни даночни контроли на мултинационални претпријатија и на тој начин ќе придонесат за успешно справување со даночната евазија и избегнување плаќање данок од страна на мултинационалните претпријатија.
![УЈП е дел од програмата „Даночни инспектори без граници’](https://new.mia.mk/index.php/images/20240405142945_big_730x400_42.webp )
Скопје, 5 април 2024 (МИА) - Даночните инспектори од Управата за јавни приходи преку експертска поддршка во наредниот период ќе стекнат вештини за спроведување конзистентни даночни контроли на мултинационални претпријатија и на тој начин ќе придонесат за успешно справување со даночната евазија и избегнување плаќање данок од страна на мултинационалните претпријатија.
Управата за јавни приходи денеска објави дека активностите се резултат на учеството во иницијативата Даночни инспектори без граници, проект кој се реализира во соработка со ОЕЦД – Организацијата за економска соработка и развој и УНДП- Програмата за развој на Обединети нации.
Директорката на УЈП, Сања Лукаревска, на хибридниот настан што се одржа по овој повод се заблагодари на Секретаријатот на Даночни инспектори без граници за одобрување на апликацијата за соработка, на експертот Сањев Шарма, кој ќе работи со инспекторите во делот на меѓународното оданочување и трансферни цени, како и до ОЕЦД и УНДП за обезбедувањето на поддршката во спроведување на овој проект.
Лукаревска истакна дека во време кога земјите имаат се поголема потреба да ги отвораат своите граници за меѓународна трговија и инвестиции, од суштинско значење е државите да можат да го наплатуваат данокот за добивката која компаниите ја остваруваат во земјата, без да ја дестимулира или нарушува меѓународната трговија или инвестициите.
-Со помош на оваа иницијатива, ги јакнеме капацитетите на УЈП за утврдување на праведното оданочување, врз основа на принципот „дофат на рака”, стандард кој се покажа како практичен и урамнотежен и за даночните администрации и за даночните обврзници, а со кој може да се проценат трансферните цени помеѓу поврзаните и неповрзаните претпријатија, под слични услови и економски околности со што се спречува двојното оданочување и даночната евазија. На долг рок, тоа ќе придонесе и за поповолна инвестициска клима, ќе овозможи да се изгради култура на усогласеност на даночните обврзници преку поефективно извршување како и прибирање на приходи во Буџетот. – рече Лукаревска.
Постојаниот претставник на УНДП Армен Григорјан рече дека оваа иницијатива е продолжение на досегашната успешна соработка меѓу УНДП и УЈП во областа на управувањето со јавните финансии.
-Сеопфатната поддршка на УНДП во делот на меѓународното оданочување и трансферните цени, постави силна основа за подобрена даночна администрација во Северна Македонија, обезбедувајќи усогласување со меѓународните стандарди и поттикнувајќи одржлив економски раст и во исто време зајакнувајќи ги нашите напори за имплементација на Целите за одржлив развој, особено целите 16: Мир, правда и силни институции и 17: Партнерства за целите. Драго ни е што преку ваквите иницијативи придонесуваме кон јакнење на институционалните капацитети и формирање на партнерства за зајакнување на даночните системи, подобрување на мобилизацијата на домашните ресурси и промовирање на одржлив развој, рече Григорјан.
Раководителот на одделот за глобални односи и развој при Организацијата за економска соработка и развој (ОЕЦД) Бен Дикинсон, истакна дека со помош на проектот, Управата за јавни приходи, во наредниот период ќе има можност со директна поддршка и помош на експертот Сањев Шарма, да ги унапреди капацитетите на даночните инспектори за спроведување на контрола на трансферните цени.
На настанот се презентираа досегашните резултати и беше појаснето дека на оваа програма во Северна Македонија, во рамките на Даночни инспектори без граници, даночните инспектори преку експертска поддршка во наредниот период, ќе стекнат вештини за спроведување на конзистентни даночни контроли на мултинационални претпријатија и на тој начин ќе придонесат за успешно справување со даночната евазија и избегнување на плаќање данок од страна на мултинационалните претпријатија.
Експертот на програмата Шарма појасни дека ќе ги пренесе знаењата и вештините на македонските инспектори, а кои се утврдени согласно со програмата Даночни инспектори без граници и техничката помош за меѓународни даночни контроли.
Настанот го следеа и донорите на Управата за јавни приходи, претставници од Меѓународен монетарен Фонд (ММФ), Светска банка, и Tрезорот на САД.
Програмата Даночни инспектори без граници, е иницијатива покрената од ОЕЦД и УНДП во 2015 година, а е наменета за поддршка на земјите во развој во справувањето со широко распространетата даночна евазија и избегнување на плаќање данок од страна на мултинационалните претпријатија. До денес, иницијативата брои 59 тековни и 73 завршени програми. лв/дма/
фото:УЈП