Училиштето „Конгреси и Манастирит“ во Чаир од денеска со фотоволтаичен кров, Ганиу најавува уште седум соларни кровови во училиштата и градинките
- Во Основното општинско училиште „Конгреси и Манастирит“ во Општина Чаир, денеска беше пуштен во употреба фотоволтаичниот кров, кој се очекува во текот на годината да произведе енергија од 26.195 kWh, а заштедата на електрична енергија може да достигне и до 50 проценти.
![Училиштето „Конгреси и Манастирит“ во Чаир од денеска со фотоволтаичен кров, Ганиу најавува уште седум соларни кровови во училиштата и градинките](https://new.mia.mk/index.php/images/20230506180432_big_730x400_25.webp )
Скопје, 6 мај 2023 (МИА) - Во Основното општинско училиште „Конгреси и Манастирит“ во Општина Чаир, денеска беше пуштен во употреба фотоволтаичниот кров, кој се очекува во текот на годината да произведе енергија од 26.195 kWh, а заштедата на електрична енергија може да достигне и до 50 проценти.
Градоначалникот на Чаир, Висар Ганиу, како што соопштија од Општината, во оваа прилика објаснил дека со пуштањето во употреба на овој соларен кров, се подразбира и намалување на потрошувачката на електрична енергија и искористување на заштедените средства за други училишни активности, поточно за унапредување на воспитно-образовниот процес.
- Фотоволтаичните кровови се чист и одржлив извор на енергија, а истовремено значат и одржлива енергетска иднина, нула негативно влијание врз животната средина, односно без загадување, зголемување на употребата на зелена технологија како и обезбедување транзиција кон чиста енергија, рекол Ганиу.
Тој најавил дека наскоро ќе бидат пуштени во употреба соларни кровови и во пет други училишта и две градинки во општина Чаир, а станува збор за: „7 Марси“, „Исмаил Ќемали“, „Хасан Приштина“, „Имри Елези“, „Лирија“ и градинките „Росица“ и „Снежана“.
Директорот на ООУ„Конгреси и Манастирит“, Фаик Ѓони истакнал дека ова е посебен ден за образовната институција што тој ја води, бидејќи на овој начин се преземаат безбедни чекори за ублажување на енергетската криза, но се зачувува и животната средина. цр/
Фото:Општина Чаир
__