Украина и Русија разменуваат обвинувања за пожарот во окупираната нуклеарна електрана Запорожје
- Москва и Киев вчера меѓусебно се обвинија дека предизвикале пожар во областа на нуклеарната централа Запорожје, која беше окупирана од Русите. Украина ги повика жителите да останат смирени и известија дека нема знаци на зголемена радијација, а пожарот во меѓувреме е изгаснат.
![Украина и Русија разменуваат обвинувања за пожарот во окупираната нуклеарна електрана Запорожје](https://new.mia.mk/index.php/images/20240812071933_big_730x400_76.webp )
Киев, 12 август 2024 (МИА) - Москва и Киев вчера меѓусебно се обвинија дека предизвикале пожар во областа на нуклеарната централа Запорожје, која беше окупирана од Русите. Украина ги повика жителите да останат смирени и известија дека нема знаци на зголемена радијација, а пожарот во меѓувреме е изгаснат.
Меѓународната агенција за атомска енергија на Обединетите нации (МААЕ), која има присуство во огромниот објект со шест реактори, соопшти дека нејзините експерти виделе густ, темен чад што доаѓа од северниот дел на централата во јужна Украина по повеќекратните експлозии.
Украинскиот претседател Володимир Зеленски ја обвини Русија дека го подметнала пожарот, кој, како што рече, бил видлив од градот Никопол, контролиран од Киев, кој гледа кон електраната под контрола на Русија.
Евгениј Балицки, руски функционер на окупираниот југ, ги обвини силите на Киев дека го подметнале пожарот со гранатирање на блискиот град Енерходар, кој беше заземен од Русија набргу по нејзината инвазија во февруари 2022 година.
МААЕ изјави дека нема пријавено влијание врз нуклеарната безбедност на локацијата.
-Нуклеарната централа денеска го извести тимот за наводен напад со дрон на една од кулите за ладење лоцирани на локацијата, напишаа тие на „X“.
Раководството на рускиот објект соопшти дека службите за итни случаи го ставиле пожарот под контрола и дека нема опасност од понатамошно ширење.
-Пожарот не влијаеше на работата на фабриката, беше соопштено.
Шест реактори во централата во близина на линијата на фронтот во Украина не работат, но централата се потпира на надворешна енергија за да го одржува нуклеарниот материјал ладен и да спречи катастрофална несреќа.
Главниот пожар во нуклеарната централа Запорожје е изгаснат, јавија денеска руските медиуми, повикувајќи се на руската државна нуклеарна компанија Росатом.
Украинската нуклеарна компанија Енергоатом на Телеграм соопшти дека е оштетена една од нејзините разладни кули (која не функционира), како и друга опрема. мс/
фото: „Х“