Гранд Рапидс, Мичиген, 20 јули 2024 (МИА) - Поранешниот американски претседател Доналд Трамп денеска ќе го одржи својот прв предизборен митинг откако пред една недела за малку ќе го загубеше животот во обид за атентат, објавија британските медиуми.

Трамп се врати на сцената неколку дена откако републиканската национална конвенција, одржана во Милвоки, Висконсин, ја одобри неговата кандидатура за претседател.

Трамп ќе се појави во градот Гранд Рапидс, во спорната држава Мичиген, заедно со неговиот нов кандидат за потпретседател, сенаторот од државата Охајо, Џеј-Ди Венс. Ова ќе биде нивна прва заедничка изборна кампања како сега официјален републикански избор за претседателски тандем.

Сè уште не е јасно каков тип на говор ќе одржи денеска поранешниот претседател, но неговите верни поддржувачи обично се собираат на такви настани за да ја слушнат потрадиционалната потпалувачка реторика на Трамп.

Трамп и Венс ќе излезат на сцената во Гранд Рапидс со обединета Републиканска партија зад нив, откако Националната конвенција се состана претходно оваа недела. Спротивно на тоа, демократите се во превирања и веќе не е сигурно дали претседателот Џо Бајден ќе биде избран за официјален демократски кандидат за соочување со Трамп на претседателските избори на 5 ноември. мс/

фото: МИА архива