Трамп со навреди за илегалните мигранти: Тие се животни и нелуѓе
- Републиканскиот претседателски кандидат Доналд Трамп на синоќешниот предизборниот митинг во Мичиген ги нарече илегалните имигранти во САД „животни и нелуѓе“.
![Трамп со навреди за илегалните мигранти: Тие се животни и нелуѓе](https://new.mia.mk/index.php/images/20240403062910_big_730x400_21.webp )
Вашингтон, 3 април 2024 (МИА) - Републиканскиот претседателски кандидат Доналд Трамп на синоќешниот предизборниот митинг во Мичиген ги нарече илегалните имигранти во САД „животни и нелуѓе“.
Тој наведе неколку злосторства извршени од илегални мигранти и предупреди дека САД ќе биде зафатена од насилство и хаос доколку тој не биде избран за претседател на 5 ноември.
Зборувајќи за Лејкен Рајли, 22-годишна студентка од Џорџија за чие убиство е осомничен мигрант од Венецуела, Трамп рече дека некои мигранти не се луѓе.
„Демократите велат: „Не ги нарекувајте животни, и тие се луѓе.“ А јас велам: „Не, тие се нелуѓе, тие се животни“, рече Трамп.
Тој ги повтори тврдењата дека мигрантите кои илегално ја минуваат границата со Мексико избегале од затвори и ментални институции и се одговорни за зголемувањето на криминалот во САД.
Трамп одржа говор со наслов „Крвопролевање на границата на Бајден“ во градот Гранд Рапидс, чија полиција објави дека 25-годишната Руби Гарсија минатиот месец била убиена од Брендон Ортиз-Вајт (25), кој илегално живее во САД.
Триесет и осум отсто од републиканците и еден од пет независни гласачи веруваат дека имиграцијата е главниот проблем во земјата, според анкетата на Ројтерс/Ипсос направена на крајот на февруари. ссм/
фото: ЕПА