Тајван испрати ловци откако кинески воени авиони ја преминаа централната линија на Тајванскиот теснец
- Воздухопловните сили на Тајван денеска тргнаа во акција откако забележаа 10 кинески воени авиони како минуваат низ чувствителната средина на Тајванскиот теснец, а Министерството за одбрана на островот соопшти дека четири кинески воени бродови исто така спроведуваат борбени патроли.
![Тајван испрати ловци откако кинески воени авиони ја преминаа централната линија на Тајванскиот теснец](https://new.mia.mk/index.php/images/20230611093450_big_730x400_20.webp )
Тајпеј, 11 јуни 2023 (МИА) - Воздухопловните сили на Тајван денеска тргнаа во акција откако забележаа 10 кинески воени авиони како минуваат низ чувствителната средина на Тајванскиот теснец, а Министерството за одбрана на островот соопшти дека четири кинески воени бродови исто така спроведуваат борбени патроли.
Ова е вторпат за помалку од една недела Тајван да пријави обновување на кинеската воена активност, откако во четвртокот 37 кинески воени авиони полетаа во зоната за воздушна одбрана на островот, од кои некои потоа заминаа кон западниот Пацифик.
Кина, која тврди дека Тајван е нејзина територија, редовно леташе со своите воздухопловни сили во близина на островот, иако не во територијалниот воздушен простор на Тајван.
Тајванското Министерство за одбрана соопшти дека открило 24 авиони на кинеското воено воздухопловство, вклучувајќи ловци Ј-10, Ј-11, Ј-16 и Су-30, како и бомбардери Х-6.
Не е наведено точно каде летале авионите, но се вели дека 10 ја преминале централната линија на Тајванскиот теснец што ги дели двете страни, што претходно служеше како неофицијална бариера, иако Кина вели дека не го признава ова и рутински ја премина границата од минатата година.
Четири бродови на кинеската морнарица се исто така ангажирани во „заеднички патроли за борбена готовност“, додаде Министерството, без да даде детали.
Тајван испрати свои ловци и распореди бродови и копнени ракетни системи за да држат стража. паг/
Фото: ЕПА