Њујорк, 12 ноември 2024 (МИА) – Судија во сојузната држава Њујорк денеска одлучи да ја паузира постапката против новоизбраниот претседател на Соединетите Американски Држави, Доналд Трамп, во која веќе е донесена пресуда, под обвиненија дека тајно и се плаќани пари на порно ѕвездата Сторми Даниелс.

Судијата Хуан Мерчан до денеска требаше да донесе одлука дали пресудата на Трамп може да биде поништена поради одлуката на Врховниот суд во јули за претседателскиот имунитет.

Окружните обвинители од Менхетен од канцеларијата на Алвин Брег во неделата преку е-пошта побараа од Мерчан да ја паузира постапката, поради победата на Трамп на изборите на 5 ноември и неговата инаугурација за нов американски претседател во јануари 2025 година.

- Трамп побара од канцеларијата да се согласи со одложување. Народот се согласува дека ова се околности без преседан, напишаа обвинителите.

Мерчан ги паузираше сите постапки за овој случај до 19 ноември. Судијата денеска имаше можност да ја поништи пресудата против Трамп, врз основа на неодамнешната одлука на Врховниот суд на САД за претседателски имунитет.

Поротата во мај го осуди Трамп за сите 34 точки од обвинението за фалсификување деловни записи поврзани со тајната исплата на актерката од филмови за возрасни Сторми Даниелс за да се откаже од обвиненијата за наводен сексуален контакт со Трамп во 2006 година за да ги подобри неговите изгледи за победа на претседателските избори во 2016 година.

Ако судијата Хуан Мерчан ја потврди обвинителната пресуда, изрекувањето на пресудата за случајот ќе беше закажано за 26 ноември, помалку од два месеци пред инаугурацијата на Трамп.

Ако судијата денеска ја отфрлеше пресудата, можеше да нареди ново судење, кое би било одложено најмалку четири години додека Трамп не си замине од функцијата или целосно да го отфрли обвинението. јт/

Фото: ЕПА архива