Стефковски: Пешачиме за мир, соживот и толеранција
- По повод почетокот на пролетта, градоначалникот на општина Гази Баба Бобан Стефковски денеска беше покровител на настан под мотото „Пешачиме за мир, соживот и толеранција“.
![Стефковски: Пешачиме за мир, соживот и толеранција](https://new.mia.mk/index.php/images/20221112152534_big_730x400_27.webp )
Скопје, 21 март 2022 (МИА) - По повод почетокот на пролетта, градоначалникот на општина Гази Баба Бобан Стефковски денеска беше покровител на настан под мотото „Пешачиме за мир, соживот и толеранција“.
- По повод почетокот на пролетта општина Гази Баба заедно со здружението на граѓани Грин Спорт и Општинскиот сојуз за училишен спорт Гази Баба организиравме настан под мотото „Пешачиме за мир, соживот и толеранција“, објави градоначалникот Стефковски на Фејсбук.
Мирот, соживотот и толеранцијата, пишува тој, се три основи на кои треба да се заснова едно општество.
- Да се има мир значи да немаме конфликт, да се има соживот значи да се почитуваме себеси но да ги почитуваме и другите, да се има толеранција значи да се има целосна почит и разбирање кон другиот, кон нивните идеи и верувања, без разлика дали истите се разликуваат од нашите, напиша Стефковски.
Додаде дека како градоначалник на општина Гази Баба дава силна поддршка на активностите поврзани со меѓуетничката интеграција во образованието, а во иднина, најави, ќе реализираат голем број настани и активности со кои ќе овозможат оддржлив начин на заедничкото живеење.
Покрај пешачењето во парк шумата засадиле и нови садници.
- Со засадувањето на новите садници, засадуваме и зрно надеж за понатамошна успешна и плодна соработка помеѓу учениците од различните етнички заедници, посочи Стефковски.
На настанот учествуваа ученици од општинските основни училишта од различни етнички заедници.
- Со ова наше заедничко организирање и делување се придонесува за подобрување на меѓусебната интеракција, се стимулира надминувањето на културните бариери, но и почитување на различните етнички заедници, напиша Стефковски.
На настанот присуствуваа и пратениците во Собранието Жаклина Пшевска и Зоран Коцевски, претседателот на Советот Дијана Илиевска и членови на Советот на општина Гази Баба. мс/са/