Старџен: Можен е референдум за независност на Шкотска есента 2021 година
Единбург, 30 ноември 2020 (МИА) - Шкотската премиерка Никола Старџен денеска не ја исклучи можноста за нов референдум за независност следната година, велејќи дека би сакала да ги види граѓаните како гласаат на почетокот на мандатот на новиот парламент, есента 2021 година.
Како што пренесуваат странските агенции, Шкотите не сакаа независност на референдумот во 2014 година, но Брегзит и начинот на кој британската Влада се бори против коронавирусот ги поддржа силите во прилог на отцепување од Велика Британија.
Прелиминарните анкети сега покажуваат дека повеќето Шкотланѓани сега се за независност.
Изборите во Шкотска треба да се одржат во мај, а Шкотската национална партија (СНП) на премиерката ќе учествува во кампањата за освојување мандат за уште еден референдум за независност.
- Сакам да одлучиме за независност на почетокот на новиот парламентарен мандат. Јас не одбивам ништо, не гарантирам ништо, но можно е гласањето да се одржи есента 2021 година, рече Старџен.
Според неа, „јасно е дека од сите причини наведени од Шкотска, таа ќе има независност за да може да си ја направи својата иднина и тоа ќе биде подобро за сите Шкотланѓани“.
- Мислам дека навистина е важно да ги имаме на располагање сите опции додека се опоравуваме од коронавирусот и моќта да го сториме тоа на вистински начин, и држава што ја обновуваме е нешто што повеќето Шкотланѓани сакаат да го видат, а не сликата на Борис Џонсон и неговите брегзитери, рече Старџен.
Премиерот на Велика Британија Борис Џонсон рече дека референдумот во 2014 година, на кој Шкотланѓаните гласаа 55:45 против независноста, бил одлучувачки и дека станува збор за настан „еден во генерација“ и затоа таа одлука треба да се почитува.
Владата на Џонсон смета дека не треба да има нов референдум во блиска иднина.
При гласањето за Брегзит, во цела Велика Британија резултатот беше 52:48 во корист на напуштање на ЕУ, но Шкотите беа главно за останување во Унијата. паг/
