Лондон, 12 март 2026 (МИА) – Британскиот премиер Кир Стармер ја презеде одговорноста за својата „грешка“ што го испрати Питер Менделсон во Вашингтон како амбасадор, додека Даунинг Стрит негираше дека имало „прикривање“ при објавувањето на досиејата поврзани со именувањето.

Премиерот се соочува со нови прашања за неговата проценка при доделувањето на амбасадорското место на Менделсон, и покрај тоа што бил предупреден за „општ репутациски ризик“ поради неговата поврзаност со педофилот Џефри Епстин, пренесе ДПА.

Во својот прв јавен настап по објавувањето на документите, Стармер им изјави на новинарите во Северна Ирска дека „објавувањето на информациите покажа што беше познато“.

- Тоа доведе до дополнителни прашања. За жал, поради истрагата на Метрополитен полицијата, сè уште не можеме да ги објавиме тие информации. Но, тоа не го менува фактот дека јас бев тој што направи грешка, и јас сум тој што им се извинува на жртвите на Епстин, и го правам тоа – рече Стармер.

Отсуството на коментарите на Стармер во купот владини трудови објавени вчера се најде под лупа, предизвикувајќи прашања за тоа дали тој ги следел процедурите.

Лидерката на Ториевците, Кеми Беденох, тврдеше дека во досиејата „недостасуваат многу информации“.

Даунинг стрит 10 соопшти дека ниту една белешка од Стармер не е редактирана.

- Го отфрлам сугерирањето за прикривање. Владата целосно ги испочитува правилата. Едноставно не прифаќам дека тоа е воопшто случај, изјави официјален портпарол. јт/

Фото: МИА архива