Приштина, 1 јули 2023 (МИА) - Европската унија усвои мерки против Косово за непреземање мерки за деескалација на ситуацијата на северот на земјата, а за тоа косовските институции и Влада беа информирани на 28 јуни, велат од ЕУ.

Неименуван портпарол на ЕУ за приштинските медиуми потврди дека работата во работните тела во рамките на Спогодбата за стабилизација и асоцијација е привремено прекината. Косово исто така нема да биде покането на состаноци на високо ниво, а билатералните посети ќе бидат прекинати.

Стапувањето на сила на овие мерки вчера веднаш го потврди и комесарот за проширување Оливер Вархеји, кога посочи дека Косово не е вклучено во распределбата на фондот од 2,1 милијарди евра одобрен од Оперативниот комитет за инвестиции на Западен Балкан.

Според портпаролот на ЕУ, мерките воведени во Косово се привремени во зависност од настаните на терен и одлуката за деескалација што може да ја донесе премиерот на Косово Албин Курти.

Најавено е дека Европската унија внимателно следи дали Србија ги исполнува официјалните барања на Брисел и дека се подготвени да преземат мерки доколку тие не се исполнат.

-ЕУ очекува Косово да дејствува на деескалација и да ги прекине полициските операции во близина на општинските згради на северот на земјата, градоначалниците привремено да ги извршуваат своите должности и што е можно поскоро да се распишат предвремени избори во четири општини и организирано на целосно сеопфатен начин, со „целосно и безусловно учество на косовските Срби“, рече портпаролот на ЕУ.

Тој исто така изјави дека е од суштинско значење брзото спроведување на Охридскиот договор, вклучително и формирањето на Заедницата на општини со српско мнозинство. мс/

фото: МИА архива