Скопје, 12 септември 2024 (МИА) - Претседателката на државата Гордана Сиљановска Давкова денеска ги примила нерезидентните амбасадори на Кралството Мароко, Закиа Ел Мидауи, на Арапската Република Египет, Надер Саад, на Државата Кувајт, Гази Хамед Алфадли, на Монголија, Сајанаа Лхагвасурен, на Грузија, Отар Бердзенишвили, на Република Молдавија, Анатол Чебук, на Република Куба, Мариета Гарсија Хордан, на Република Индија, Санџај Рана, и на Исламска Република Пакистан, Модсар Чаудaри, кои се со седиште во Софија.

На средбата претседателката Сиљановска Давкова ја истакнала посветеноста од македонска страна за зајакнување на дипломатските односи со секоја од државите, како на билатерален, така и на мултилатерален план.

- Нашите врати се секогаш отворени за дијалог и со нетрпение очекуваме тесно да соработуваме со вас за да го истражиме целосниот потенцијал на нашите дипломатски и економски односи. Во таа насока, се надевам дека поблиските билатерални односи и почестите средби ќе го отворат патот за отворање на амбасадите на вашите почитувани земји овде во Скопје, рекла претседателката Сиљановска Давкова, се наведува во соопштението од нејзиниот Кабинет.

Таа посочила на огромниот потенцијал за развој на економска соработка, претставувајќи го атрактивното инвестициско опкружување на земјата, кое се карактеризира со стратешка географска локација, стабилна монетарна политика, поволни даночни услови и квалификувана работна сила.

Претседателката Сиљановска Давкова ги претставила актуелните состојби во државата по одржаните претседателски и парламентарни избори, приоритетите по однос на реформскиот процес, економскиот развој и надворешно-политичките односи.

Во тој контекст, Сиљановска Давкова посочила на членството во НАТО и европската интеграција како клучни аспекти во надворешната политика на државата.

- Како членка на НАТО, нашата земја сериозно и одговорно ја прифати својата улога. Нашето членство не само што ја зајакнува нашата национална безбедност, туку и ни овозможува значително да придонесеме за регионалната и глобалната стабилност. Активно учествуваме во операциите на НАТО, воените вежби и процесите на донесување одлуки, демонстрирајќи ја нашата заложба за принципите и целите на Алијансата, рекла претседателката Сиљановска Давкова.

По однос на процесот на интеграција во Европската Унија, претседателката Сиљановска Давкова нагласила дека нашата земја продолжува да презема значајни чекори кон полноправно членство во ЕУ и дека тоа останува стратешки приоритет за земјата, оценувајќи дека нашата интеграција кон ЕУ е сложена и вклучува различни аспекти.

- Очекуваме јасна потврда од Европската Унија за нејзината посветеност на проширувањето кон Западен Балкан, слично на ставот искажан на Самитот во Солун. Мислам дека билатерализацијата на европскиот процес никому нема биде од корист и ќе им служи на интересите на трети земји со различни цели на Западен Балкан, потенцирала претседателката Сиљановска Давкова. цр/са/

Фото: Претседателката на државата Гордана Сиљановска Давкова