Средба на гувернерката на НБ со учениците кои донесоа бронзен медал од Меѓународната економска олимпијада
- Финансиската едукација и финансиската инклузија, со особено внимание на младата популација, се значаен приоритет на Народната банка. Оттаму, Народната банка поддржува повеќе инцијативи во овој сегмент, вклучително и учеството на Меѓународната економска олимпијада, а особено радува кога младите се истакнуваат со забележителни знаења на меѓународните натпревари, изјави гувернерката на НБ Анита Ангеловска-Бежоска на денешната средба со учениците од средните училишта, овогодишните учесници на Меѓународната економска олимпијада и професорите Анета Гацовска-Барандовска и Стево Ѓоргиев од Институтот за математика при Природно-математичкиот факултет во Скопје, кои ги координираа подготовките на тимот.
![Средба на гувернерката на НБ со учениците кои донесоа бронзен медал од Меѓународната економска олимпијада](https://new.mia.mk/index.php/images/20230907125114_big_730x400_76.webp )
Скопје, 7 септември 2023 (МИА) - Финансиската едукација и финансиската инклузија, со особено внимание на младата популација, се значаен приоритет на Народната банка. Оттаму, Народната банка поддржува повеќе инцијативи во овој сегмент, вклучително и учеството на Меѓународната економска олимпијада, а особено радува кога младите се истакнуваат со забележителни знаења на меѓународните натпревари, изјави гувернерката на НБ Анита Ангеловска-Бежоска на денешната средба со учениците од средните училишта, овогодишните учесници на Меѓународната економска олимпијада и професорите Анета Гацовска-Барандовска и Стево Ѓоргиев од Институтот за математика при Природно-математичкиот факултет во Скопје, кои ги координираа подготовките на тимот.
Гувернерката Ангеловска-Бежоска, како што се наведува во соопштението на НБ упатила срдечни честитки до добитникот на бронзениот медал, ученикот Давид Ставров од ПСУ „Алгоритам“, Скопје, како и до Рина Толева и Давид Арсовски од СЕПУГС „Васил Антевски-Дрен“, Скопје, кои биле во состав на тимот на Економската олимпијада во Волос, Грција.
На Шестата меѓународна економска олимпијада којашто се одржа во периодот од 25 јули до 2 август учествуваа 50 тима од 48 земји во светот, а домаќин беше Универзитетот на Тесалија од Волос. Учениците се натпреваруваа во три дела: тест од економија, игра за финансиска писменост и бизнис-студија.
-Охрабрувачки факт е дека меѓу големиот број водечки економии во светот, ние го освоивме дваесет и второто место во генералниот пласман, наведува НБ.
Народната банка, како што се вели во соопштението, зеча активно учество во подготвителните активности на учениците за учество на Олимпијадата.
-Активностите на централната банка, поточно серијата предавања за учениците во состав на нашиот тим, како и презентациите за дополнување на знаењата и одговорите на различните модули вежби и едукативни игри, се во рамките на соработката којашто централната банка ја остварува со Сојузот на математичари, за што е склучен и Меморандум за соработка. Финансиската едукација, исто така, е еден од стратегиските приоритети на НБ за што е усвоена и Стратегија за финансиска едукација и финансиска инклузија од страна на финансиските регулатори, предводени од НБ, се додава во соопштението. ац/