Скопје, 10 април 2025 (МИА) – Можностите за зајакнување на партнерството и соработката во различни области со акцент на капиталните инвестиции, биле во фокусот на денешната средба на потпретседателот на Владата и министер за односи меѓу заедниците Иван Стоилковиќ со амбасадорот на Кралството Шпанија, Рафаел Сориано Ортиз.

На средбата, како што соопшти Кабинетот на Стоилковиќ, биле разменети мислења за актуелните политички и економски прашања во земјава и регионот, со цел реализација на заеднички инвестиции и задржување на владиниот приоритет - силен економски развој и целосна трансформација на државата.

Вицепремиерот Стоилковиќ го запознал шпанскиот амбасадор со функционирањето на Министерството за односи меѓу заедниците, плановите за оваа календарска година и нагласил дека интензивно се работи на промена на односот кон помалите етнички заедници. Воедно, изразил благодарност за континуираната поддршка од Шпанија, резултат на повеќе од 30-годишните дипломатски односи и традиционално пријателство, особено во процесот на евроинтеграциите на нашата земја.

Шпанскиот амбасадор упатил пораки на поддршка и признание за постигнатиот напредок, уверувајќи дека напредокот во процесот на проширување на ЕУ заснован врз систем на заслуги и принципиелни политики и понатаму останува високо на агендата.

Двајцата соговорници се согласиле дека соработката меѓу двете земји, пред сѐ, базирана на долгогодишно пријателство е клучна, и дека таа дополнително треба и може да се продлабочува. дма/бак/
 

Фото: Кабинет на потпретседател на Владата на РСМ и министер за односи меѓу заедниците