Скопје, 9 ноември 2024 (МИА) - Компанијата dm дрогерие маркт денеска го најави продолжението на екопроектот „Пошумуваме заедно за позелено утре!“ Дрогерискиот синџир овој проект го почна во 2022 година, а преку своите досегашни активности засади околу 60.000 нови садници. До крајот на оваа сезона на пошумување, компанијата ќе достигне јубилеен број од 100.000 засадени дрвја.

Новиот циклус на проектот „Пошумуваме заедно за позелено утре“ официјално почна денеска, со акција во која беа засадени повеќе од 300 нови садници во „Рајски парк“ во скопската општина Аеродром. Компанијата уште еднаш ја потенцираше важноста на пошумувањето и директно ја покажа својата заложба за зачувување и обновување на зелените површини во земјава. Во акцијата беа вклучени вработени од компанијата, волонтери од повеќе здруженија, институционални партнери, медиуми и инфлуенсери.

За проектот „Пошумуваме заедно за позелено утре“ за оваа година компанијата dm дрогерие маркт одвои повеќе од 1.200.000 денари донација, во форма на набавка на садници и техничка опрема.

- Секое ново засадено дрвце нѐ носи чекор поблиску до нашата цел. Цврсто сме уверени дека нашите континуирани заложби, ентузијазмот и визијата ќе го дадат посакуваниот резултат - Позелено утре за сите нас. Посебно сме горди на сите наши колеги кои денеска, но и години наназад несебично го даваат својот придонес кон оваа цел, а нашата благодарност ја изразуваме и кон сите совесни граѓани, здруженија, институции и медиуми, кои нѐ поддржуваат во остварување на резултатите. Се надеваме дека со нашите акции ќе дадеме пример и ќе поттикнеме понатамошно ширење на грижата за нашата околина, бидејќи верувам дека сме свесни колку ни е тоа и повеќе од потребно, изјави Кристина Дуранска, менаџер за маркетинг и комуникации во dm дрогерие маркт во Македонија.

Активностите во рамки на овој проект оваа година ќе продолжат за само неколку денови со хортикултурно уредување на дворовите на ОУ „Славејко Арсов“ и детската градинка „Сончогледи“ во Штип. На 24 ноември 2024 година ќе се реализира уште едно масовно пошумување во близина на езерото „Младост“ во Велес, на површина што неодамна беше зафатена од пожар. За време на садењето доброволно ќе учествуваат вработени од компанијата dm, но целта е во проектот да се приклучат и што повеќе еколошки свесни граѓани, институции и организации со кои заедно ќе се пошумат 18 хектари нови зелени површини. Сите заинтересирани граѓани кои сакаат да се приклучат на оваа акција можат да го направат тоа на следниот линк.

Целта на компанијата е во финалето на третата сезона да се постигне вкупен број на 100.000 засадени дрвја. мд/сст/

Фото: dm дрогерие маркт