Прилеп, 16 ноември 2022 (МИА) - Со низа активности, прилепскиот Дом за стари и изнемоштени лица „Киро Крстески - Платник“ ја одбележува Неделата  на грижа за старите лица. Во рамки на активностите, во Домот практиканти од Средното медицинско училиште „Ѓорче Петров“  ги вакцинираа корисниците, ги посетуваат и им прават преглед на старите лица, штитеници на Домот.

Како што објаснува директорот на прилепскиот Дом за стари лица Благојче Стојаноски со активностите се вакцинирани 65 штитеници против сезонски грип.

- Штитениците кои изразија желба се вакцинирани против сезонски грип. Практикантите од Средното медицинско училиште „Ѓорче Петров“ и во текот на денешниот ден се во посета на Домот, им пружаат грижа на старите лица, им мерат притисок, им прават основни прегледи и им излегуваат во пресрет со грижата за нив, вели Стојаноски.

Во прилепскиот Дом за стари и изнемоштени лица „Киро Крстески - Платник“ се згрижени 145 лица од речиси сите градови во земјава. Капацитетот е 150 лица, што значи, потврдуваат од Домот, е полно и интересот е голем за згрижување. ем/мд/