Токио, 18 април 2020 (МИА) - Сони доби патент за интересен производ, кој може да се најде на пазарот во блиска иднина и да ги направи животите на осамените гејмери поинтересни, ​​користејќи ја конзолата плејстејшн. Според описот во документот објавен на веб-страницата на Управата за патенти на САД, станува збор за придружник робот, кој може да ги сподели со гејмерот емоциите од играње со конзолата на Сони. Самиот робот нема да учествува во играта. Наместо тоа, тој ќе реагира на емоциите на корисникот за време на играта. Едноставно кажано, роботот ќе се радува или ќе се нервира со гејмерот. Во документот се споменуваат и други цели на роботот. Според истражувањето, мотивацијата на гејмерот се зголемува ако има набудувач до него. Роботот може да игра таква улога не само во текот на играта, туку и кога гледа видео. Очигледно, концептот на таков робот е да им помогне на осамените гејмери. Ако таков уред оди на пазарот, несомнено ќе стане популарен во Јапонија, каде што осаменоста е голем јавен проблем.