Скопје, 10 февруари 2022 (МИА) - Меѓународниот Аеродром Скопје повторно се стекна со признание од Меѓународниот совет на аеродроми (ACI – Airports Council International World) во иницијативата наречена „Гласот на клиентот“, со која се препознаваат и им се оддава признание на аеродромите што вложиле и покажале значајни напори во собирање повратни информации од патниците преку програмата за Квалитет на аеродромските услуги. Според информациите од ACI, скопскиот аеродром е еден од преку 200 аеродрома на светско ниво што даваат приоритет на слушање на клиентите за време на пандемијата и што се стекнаа со ова признание. Меѓународниот Аеродром Скопје припаѓа во група од 86 аеродроми во регионот на Европа; потоа следат 73 аеродроми во Азиско-Пацифичкиот регион, 32 аеродрома од Северна Америка, 16 аеродроми од Латинска Америка-Кариби, 10 аеродроми од Африка и 8 аеродроми од Блискиот Исток. Генерален директор на ТАВ Македонија, Метин Батак, израизува задоволство што Меѓународниот Аеродром Скопје е препознаен и признаен од страна на Меѓународниот совет на аеродроми и тоа по втор пат по ред откако оваа иницијатива започна во 2020 година. - Задоволството на нашите клиенти секогаш е наш врвен приоритет. Преку aнкетите за Квалитет на аеродромските услуги на ACI ние сме поблиску до нашите клиенти бидејќи слушањето на нивните мислења и коментари навистина ни помагаат да ги подобриме нашите услуги со само една цел пред нас, а тоа е да ги исполниме потребите и очекувањата на патниците кои што патуваат преку нашите аеродроми и во исто време да направиме тие да се чувствуваат безбедни и релаксирани, вели Батак. ТАВ Македонија, како што информираат од компанијата, ја заврши 2021 година со вкупно 1.392.378 патници кои патувале преку двата аеродрома, Меѓународен Аеродром Скопје и Аеродромот Св. Апостол Павле – Охрид. Оваа бројка, споредена со 2019 година (2.677.618), како референтна година, или година пред пандемијата, покажува 48 проценти пад во патничкиот сообраќај, додека споредено со 2020 година, кога вкупната бројка на патници беше 782.876, прикажува 78 отсто пораст во бројот на патници. аа/са/