Буенос Аирес, 1 април 2026 (МИА) - Сиромаштијата во Аргентина падна на најниско ниво во последните седум години, според официјалните бројки објавени вчера, поради строгите политики за штедење на ултралибералниот претседател Хавиер Милеи.

Според статистичкиот завод на земјата ИНДЕЦ, околу 28,2 % од Аргентинците живееле во сиромаштија во втората половина од 2025 година во споредба со 38,1 % една година претходно.

Речиси 13 милиони луѓе во јужноамериканската земја живеат под линијата на сиромаштија. Според ИНДЕЦ, процентот на екстремно сиромашни луѓе паднал на 6,3 %. Ова е за 1,9-процентни поени помалку отколку во втората половина од 2024 година.

Според експертите, намалувањето на сиромаштијата се должи на пониската инфлација, меѓу другите фактори.

Милеи е на власт од декември 2023 година. Кога ја презеде функцијата, 41,7 % од луѓето во Аргентина биле погодени од сиромаштија.

Во првите неколку месеци од неговата влада нивото на сиромаштија првично значително се зголеми на повеќе од половина од населението откако ги намали социјалните програми и субвенциите. мс/јт/

фото: Архива