Париз, 11 септември 2020 (МИА) - Серена Вилијамс најави дека дефинитивно ќе игра на претстојниот „Ролан Гарос“ на крајот на месецот. Американката, која во предвечерието на турнирот наполни 39 години, нема намера да се откаже од својата цел да ја освои рекордната 24-та Гренд-слем титула, и покрај поразот од Викторија Азаренка во полуфиналето на УС Опен вечерва. - Дефинитивно ќе одам во Париз, рече Вилијамс по поразот во полуфиналето. Американката има свој стан во главниот град на Франција, каде тешко дека ќе може да остане за време на турнирот, бидејќи организаторите на „Ролан Гарос“ бараат сите учесници да бидат ставени во карантин во два хотели. Во исто време, на трибините на терените ќе биде дозволен ограничен број гледачи. - Тоа е интересно решение. Нема сместување надвор, но има и навивачи. Но, јас сум свесна за ситуацијата. Јас сум супер-конзервативна бидејќи имам сериозни здравствени проблеми. Затоа се обидувам да се држам настрана од јавни места. Бев хоспитализирана неколку пати. Јас сум во лоша состојба. Не сакам повторно да бидам во таква ситуација. Ќе се обидам да задржам дистанца од сите други - не два метра, туку најмалку четири, рече Вилијамс. Отвореното првенство на Франција започнува на 27 септември и ќе трае до 11 октомври.