Селин Дион го одложи новото шоу во Лас Вегас, поради здравствени проблеми
- Пејачката „доживува тешки и напорни грчеви во мускулите“ што ја спречуваат да настапува, се вели во соопштението за печатот.
![Селин Дион го одложи новото шоу во Лас Вегас, поради здравствени проблеми](https://new.mia.mk/index.php/images/20221108204402_big_730x400_24.webp )
Лас Вегас, 20 октомври 2021 (МИА) - Светски познатата канадско-американска пејачка Селин Дион го одложува отворањето на своето ново шоу во Лас Вегас, поради здравствени проблеми.
Легендарната пејачка „доживува тешки и напорни грчеви во мускулите“ што ја спречуваат да настапува, се вели во соопштението за печатот. - „Нејзиниот медицински тим продолжува да ја проценува и третира. Сепак, симптомите што ги доживува, не ѝ дозволуваат да учествува во тековните проби за новото шоу “.
Дион требаше да отвори ново шоу во „Ресортс ворлд театарот“ (Resorts World Theatre) во Лас Вегас на 5 ноември. Меѓутоа, претставите за оваа година, како и оние за јануари и февруари, се откажани.
„Ме скрши срцето од ова“, напиша Дион на Инстаграм. - „Мојот тим и јас работевме на нашето ново шоу изминативе осум месеци, и тоа што не можеме да го отвориме овој ноември ме растажува многу“.
Во интервју претходно оваа година, Дион проговори зошто толку години настапува во Лас Вегас, истакнувајќи дека тоа ѝ овозможува да остане на едно место со своето семејство.
Новиот датум на отворање на нејзиното ново шоу сѐ уште не е одреден. Од друга страна, продолжението на „Светската турнеја за храброст“ на Дион сѐ уште важи за во март. си/