Северна Македонија и Грција потпишаа програма за билатерална воена соработка за 2021 година
- Помош и поддршка за прашањата поврзани со интеграција на армијата на Северна Македонија во НАТО структурите, обука и едукација во центри на грчката армија, соработка за низа теми од заеднички
![Северна Македонија и Грција потпишаа програма за билатерална воена соработка за 2021 година](https://new.mia.mk/index.php/images/20221107020225_big_730x400_97.webp )
Атина, 19 април 2021 (МИА) - Помош и поддршка за прашањата поврзани со интеграција на армијата на Северна Македонија во НАТО структурите, обука и едукација во центри на грчката армија, соработка за низа теми од заеднички воен интерес, вклучува програмата за билатерална воена соработка за 2021 година потпишана меѓу Северна Македонија и Грција, јави дописничката на МИА од Атина.
- Со потпишувањето на конкретната програма дополнително се надградува воената соработка и интероперабилноста меѓу вооружените сили на двете земји со спроведување како на заеднички вежби, така и оперативни активности. Во исто време, се истакнува клучната улога на Грција во брзата и ефикасна интеграција на соседната земја во механизмите на Алијансата, факт што ги промовира безбедноста и стабилноста во поширокиот регион на Балканот, соопштуваат од Генералштабот на грчката армија за потпишаната програма.
Поконкретно, програмата вклучува помош во прашањата поврзани со интеграција на армијата на Северна Македонија во структурите на Алијансата, вклучува прашања за едукација и обука во грчки воени институции и школи на трите сектори на вооружените сили, обезбедување на специјализирана обука во неколку центри како што е Мултинационалниот тренинг центар за поддршка на мировни операции и Центарот за воздушна и ракетна одбрана, активности за понатамошна надградба на соработката во специјалните операции со спроведување на заеднички обуки во двете земји, како и соработка за сајбер просторите, информациите, воена медицина и логистиката. ср/сп/